სათამაშოების მწარმოებელმა ჩინურმა Pop Mart International Group-მა 2025 წლის მესამე კვარტალში ძლიერი ზრდა დააფიქსირა, მათ შორის გაყიდვების მინიმუმ 1,265%-იანი ზრდა ამერიკაში, რამაც ოთხშაბათს ჰონგ-კონგში რეგისტრირებული კომპანიის აქციები 2.4%-ით გააძვირა. როგორც ჩანს, Labubu-ს სამომავლო პერსპექტივებთან დაკავშირებით ინვესტორების შეშფოთება გაქრა, ამ ეტაპზე მაინც.
Labubu-ს თოჯინების მწარმოებელმა კომპანიამ სამშაბათს განაცხადა, რომ ივლის-სექტემბრის პერიოდის შემოსავლები წინა წელთან შედარებით 245%-ით გაიზარდა, თუმცა ზუსტი ციფრების გამჟღავნების გარეშე.
საფონდო ბირჟის დეკლარაციის თანახმად, კონტინენტურ ჩინეთში გაყიდვები წლიურად 185%-დან 190%-მდე გაიზარდა, ხოლო ქვეყნის ფარგლებს გარეთ ბაზრებიდან მიღებული შემოსავლები 365%-დან 370%-მდე.
Labubu ბევრი ცნობილი ადამიანისთვის, მათ შორის კიმ კარდაშიანისა და ლედი გაგასთვის, ჩანთების გასაფორმებელ პოპულარულ აქსესუარებად იქცა.
ამის გარდა, ოქტომბრის დასაწყისში, Apple-ის გენერალურმა დირექტორმა ტიმ კუკმა მიიღო პერსონალური Labubu, როდესაც შანხაიში, ჩინეთის ტურის ფარგლებში Pop Mart-ის გამოფენას ეწვია. ის ასევე შეხვდა კომპანიის 38 წლის დამფუძნებელს ვანგ ნინგს, რომლის წმინდა ქონებაც, Forbes-ის შეფასებით, Pop Mart-ში მისი წილის გათვალისწინებით, 21.1 მილიარდ დოლარს შეადგენს.
