საქართველოს ენერგეტიკისა და წყალმომარაგების მარეგულირებელმა ეროვნულმა კომისიამ (სემეკ) ელიზბარ ერისთავის სახელობის სასწავლო ცენტრი დააფუძნა. ცენტრის მიზანია, ენერგეტიკისა და წყალმომარაგების სექტორებში ხელი შეეწყოს საგანმანათლებლო დონისა და კვალიფიკაციის ამაღლებას დაინტერესებულ ჯგუფებში.
სემეკის თავმჯდომარე დავით ნარმანია განმარტავს, რომ სასწავლო ცენტრში ტრენინგების გავლა შეეძლებათ სტუდენტებს, რეგულირებადი კომპანიების, არასამთავრობო სექტორის, მედიის წარმომადგენლებსა და სხვა დაინტერესებულ პირებს. ტრენინგები ჩატარდება ენერგეტიკის სექტორში არსებული ახალი საკანონმდებლო ბაზის, კომისიის ნორმატიული აქტების შემუშავების პრინციპების, სატარიფო პოლიტიკის, სამართლებრივი და ეკონომიკური მიზნების, დანახარჯების მარეგულირებელი აუდიტის, ახალი ლიბერალური ბაზრის ძირითადი პრინციპების და ენერგეტიკის სექტორში კონკურენციის მნიშვნელობის შესახებ.
„ჩვენთვის ძალიან მნიშვნელოვანია სასწავლო ცენტრის დაფუძნება. საკანონმდებლო ცვლილებების შესაბამისად, სემეკს მიენიჭა საგანმანათლებლო საქმიანობის უფლება. შესაბამისად, დავაარსეთ ბატონი ელიზბარ ერისთავის, სემეკის პირველი თავმჯდომარის სახელობის ენერგეტიკის სასწავლო ცენტრი. სასწავლო ცენტრის საქმიანობა განსაკუთრებით საჭირო და აუცილებელია ახალი ენერგეტიკული ბაზრების ჩამოყალიბების პროცესში. სემეკს დღეისათვის გააჩნია კვალიფიციური ცოდნა არსებული საკვანძო საკითხების შესახებ. გარდა ამისა, სემეკის თანამშრომლებისთვის ხელმისაწვდომია სხვადასხვა საერთაშორისო ორგანიზაციისა და პროექტის ფარგლებში შემუშავებული დოკუმენტები, რომლის გაზიარებაც მნიშვნელოვანია ენერგეტიკისა და წყალმომარაგების სექტორებში საქმიანობის განმახორციელებელი პირებისთვის. კომისიისათვის მნიშვნელოვანია, რომ დაინტერესებულმა პირებმა სასწავლო ცენტრის ფარგლებში მიღებული ცოდნა გამოიყენონ შემდგომ საქმიანობაში. სასწავლო ცენტრის ფარგლებში განხორციელდება სხვადასხვა პროექტი. ერთ-ერთ მიმართულებას წარმოადგენს ენერგეტიკული თემატიკის, ენერგოეფექტურობის შესახებ ცნობიერების ამაღლება სასკოლო ასაკის ბავშვებში,“ – განაცხადა სემეკის თავმჯდომარე, დავით ნარმანიამ.
სასწავლო ცენტრს უხელმძღვანელებს ნუგზარ ბერიძე. იგი არის ტექნიკის მეცნიერებათა დოქტორი, პროფესორი, 70-მდე სამეცნიერო ნაშრომის, პატენტისა და საავტორო მოწმობის ავტორი. სხვადასხვა პერიოდში ნუგზარ ბერიძე ეწეოდა სამეცნიერო-პედაგოგიურ საქმიანობას საქართველოს აგრარულ უნივერსიტეტში, გრიგოლ რობაქიძისა და ქუთაისის „აკაკი წერეთლის“ უნივერსიტეტებში. 1996-2006 წლებში აგრარულ უნივერსიტეტში იგი იყო სამეცნიერო კვლევით ინსტიტუტის დირექტორი. ნუგზარ ბერიძე წლების განმავლობაში ხელმძღვანელობდა სემეკის ელექტროენერგეტიკის დეპარტამენტს. სხვადასხვა პერიოდში ნუგზარ ბერიძე იყო ევროკავშირის Twinning-ის პროექტების ადგiლობრივი მრჩეველი, მარეგულირებელთა რეგიონული ასოციაციის (ERRA) ლიცენზირების კომიტეტის წევრი. 2007 წლიდან დღემდე არის NARUC (კომუნალური მომსახურების ეროვნული კომისიების ასოციაციების), CEER (ევროპის ენერგეტიკის მარეგულირებელთა საბჭოს), Energy Community (ენერგეტიკული თანამეგობრობის); EU4E – ევროკავშირი საქართველოსათვის და სხვა საერთაშორისო და ადგილობრივი ორგანიზაციების მიერ ენერგეტიკის რეგულირების აქტუალურ საკითხებზე ორგანიზებული სამუშაო შეხვედრების, სემინარებისა და კონფერენციების მონაწილე. იგი კონსულტაციებს უწევდა სხვადასხვა ქვეყნებს (ტაჯიკეთი, უზბეკეთი, ყაზახეთი, აზერბაიჯანი) ელექტროენერგეტიკის რეგულირების საკითხებში.
სასწავლო ცენტრის საორგანიზაციო საბჭოს წევრები არიან ქეთევან ბერიკაშვილი – სემეკის პრესსპიკერი, სალომე ჯანელიძე – სემეკის იურიდიული დეპარტამენტის დირექტორი, ელეონორა ლაგვილავა – სემეკის ადამიანური რესურსისა და საქმისწარმოების დეპარტამენტის დირექტორი, მარიამ იოსელიანი – საერთაშორისო ურთიერთობათა დეპარტამენტის დირექტორი.
