ერაყის სახელმწიფო საინფორმაციო საშუალება, გაზეთი Al-Sabaah ერაყის ნავთობის მინისტრის, იჰსან აბდულ ჯაბარზე დაყრდნობით იუწყება, რომ ერაყის მთავრობა საუდის არაბეთთან რამდენიმე მილიარდის ღირებულების ენერგეტიკული კონტრაქტის დადებას გეგმავს.
ოფიციალური ბაღდადი პარტნიორობას Saudi Aramco-სთან განიხილავს. მათი განცხადებით, ისინი ერაყის დასავლეთ უდაბნოში ბუნებრივი აირის საბადოების გამოკვლევასა და განვითარებას გეგმავენ.
ერაყის მთავრობა მოლაპარაკებებს ასევე საუდის არაბეთის Acwa Power-თანაც აწარმოებს, რათა ააშენოს წყლის გამწმენდი სადგურები და მზის ენერგიის სადგურები ერაყში – აღნიშნულია Al-Sabaah–ს მიერ გასაჯაროებულ ინფორმაციაში.
აღსანიშნავია, რომ ორი ქვეყანა ერთობლივი ნავთობქიმიური პროექტების დაწყების პერსპექტივასაც განიხილავს.
შეგახსენებთ, რომ Saudi Aramco მსოფლიოს ყველაზე დიდი ნავთობის მწარმოებელია, რომლის შემოსავალი მიმდინარე წლის მესამე კვარტალში 158%–ით გაიზარდა და $30.4 მილიარდი შეადგინა.
ფოტო: REUTERS/Essam al-Sudani
