გრემის ჯილდოს მფლობელი ვოკალისტის, ემი უაინჰაუსის რვაასზე მეტი პირადი ნივთისაგან შემდგარი კოლექცია, მათ შორის მომღერლის ფეხსაცმელი, წიგნები, ჩანაწერები და ის კაბა, რომელშიც მომღერალმა უკანასკნელი კონცერტი ჩაატარა, აშშ-ის ერთ-ერთ აუქციონზე გაიყიდება. მოსალოდნელია, რომ უაინჰაუსის ნივთების კოლექცია $2 მილიონად გაიყიდება.
ბრიტანელი მომღერალი 2011 წელს, ალკოჰოლური ზედოზირების შედეგად, ოცდაშვიდი წლისა გარდაიცვალა. უაინჰაუსის გარდაცვალების შემდეგ მის ინტელექტუალურ საკუთრებას მშობლები უძღვებიან – იმავე წელს მათ „ემი უაინჰაუსის ფონდი“ შექმნეს, რომელიც სხვადასხვა დამოკიდებულების მქონე ახალგაზრდებს ეხმარება.
„გარდაცვლილი ქალიშვილის მშობლებთან აუქციონის ჩატარება საკმაოდ რთულია“, – აღნიშნა სააუქციონო სახლ Julien-ის ხელმძღვანელმა, მარტინ ნოლანმა. „[კოლექციის გაყიდვასთან] შეგუებას, [მშობლები] დიდი ხნის განმავლობაში ეცადნენ და საბოლოოდ მიხვდნენ, რომ მთელ მსოფლიოში არიან გულშემატკივრები, მუზეუმები და კოლექციონერები, რომელთაც სურთ, ეს ნივთები ჰქონდეთ, მათ მოუარონ, ისინი მუზემებში გამოფინონ და [ემი უაინჰაუსის] მემკვიდრეობა და მის შესახებ არსებული მოგონებები დაიცვან. თან, ამგვარად, მათი ფონდისთვის თანხის მოგროვებაც შეუძლიათ“.
აუქციონზე გამოტანილი ნივთების დათვალიერება და შეძენა სააუქციონო სახლ Julien-ის ოფიციალურ ვებ-გვერდზე შეგიძლიათ.
