აშშ-ის პრეზიდენტმა დონალდ ტრამპმა ხუთშაბათს ხელი მოაწერა ბრძანებას, რომლის მიხედვითაც, ივლისში იაპონური ავტომობილებისა და სხვა პროდუქტების იმპორტზე გამოცხადებული ტარიფები შემცირდება. აშშ-სა და აზიურ ქვეყანას შორის შეთანხმების ფორმალიზება თვეების განმავლობაში მიმდინარე მოლაპარაკებების შემდეგ მოხდა.
შედეგად, იაპონურ ავტომობილებზე მანამდე დაწესებული 27.5%-იანი ტარიფი 15%-მდე შემცირდება. განახლებული სატარიფო განაკვეთი ძალაში ბრძანების ოფიციალური გამოქვეყნებიდან შვიდი დღის შემდეგ შევა. აღსანიშნავია, რომ შეთანხმება აშშ-ის პროექტებში იაპონიის მიერ 550 მილიარდი დოლარის ინვესტირებასაც ითვალისწინებს. გარდა ამისა, მხარეები კომერციულ თვითმფრინავებსა და ნაწილებზე ნულოვან ტარიფებზე შეთანხმდნენ.
დონალდ ტრამპის მიერ გლობალურ გადაზიდვებზე დაწესებულმა გადასახადებმა იაპონიის ექსპორტი შეამცირა და იაპონურ ავტომწარმოებლებს მძიმე დარტყმა მიაყენა.
იაპონიის უმსხვილესმა ავტომწარმოებელმა Toyota-მ აზიურ ქვეყანასთან სავაჭრო შეთანხმების მისაღწევად ტრამპის ძალისხმევა შეაქო და განაცხადა: „მიუხედავად იმისა, რომ აშშ-ში Toyota-ს მიერ გაყიდული მანქანების თითქმის 80% ჩრდილოეთ ამერიკაშია დამზადებული, ეს ჩარჩო საჭირო სიცხადეს უზრუნველყოფს.“
