ერთი წლის განმავლობაში, დოლანდ ტრამპმა მოახერხა მეორე ვადით თეთრ სახლში დაბრუნებულიყო, ამასთან ერთად კი თავისი ქონება თითქმის გაეორმაგებინა – ძირითადად მისი სოციალური ქსელის, პლატფორმა Truth Social-ისა და კრიპტოს წყალობით. Forbes-ის უახლესი შეფასებით, ამერიკის შეერთებული შტატების რიგით 47-ე პრეზიდენტის დონალდ ტრამპის სიმდიდრე, მხოლოდ ერთ წელიწადში, $2.3 მილიარდიდან $5.1 მილიარდამდე გაიზარდა. და ეს მაშინ, როდესაც გასულ წელს, ტრამპის ანგარიშზე დაახლოებით $413 მილიონის ნაღდი ფული და თაღლითობის ბრალდებით, ნიუ-იორკის სასამართლოს მიერ შეფარდებული $454-მილიონიანი ჯარიმა ირიცხებოდა.
მონაცემების გაყალბების 34-ვე შემთხვევაში, ტრამპი ნიუ-იორკის სასამართლომ დამნაშავედ ჯერ კიდევ მიმდინარე წლის დასაწყისში ცნო. თუმცა ქვეყნის ამჟამინდელმა პრეზიდენტმა აღიარა, რომ $454 მილიონის ნაღდი ფულით გადახდა არ შეეძლო და სასამართლოს ობლიგაციის თანხის შემცირების მოთხოვნით მიმართა. იშვიათ შემთხვევებში სასამართლო ამ ტიპის მოთხოვნებს აკმაყოფილებს. ახლაც, ტრამპის ჯარიმა $175 მილიონამდე შემცირდა და მან აქტივების ჩამორთმევაც თავიდან აირიდა.
შემდგომში ტრამპმა უკვე ბიზნესმენის ხედვა გამოიყენა და სოციალური მედიის პლატფორმა Truth Social-ის მშობელი კომპანიის აქციები საჯაროდ დალისტა. ტრამპის კომპანიას მილიონობით დოლარის შემოსავალთან ერთად, ათობით მილიონის ზარალი მოაქვს, თუმცა ეს ნაკლებად მნიშვნელოვანია პრეზიდენტის მხარდამჭერი ინვესტორებისთვის, რომლებიც კომპანიის აქციებს საკმაოდ მაღალი ღირებულებით ყიდულობდნენ. 7 მარტის მდგომარეობით, ტრამპი კომპანიაში $2.6 მილიარდის ღირებულების აქციებს კვლავ ფლობს, რაც მისი სიმდიდრის მნიშვნელოვან ნაწილს წარმოადგენს.
შედეგად გაიზარდა ტრამპის ქონების ღირებულება, თუმცა არა ლიკვიდურობა – ტრამპს ნაღდი ფული სჭირდებოდა, მაგრამ თავისი აქციების გაყიდვა არ შეეძლო. აქედან გამომდინარე, ტრამპმა კრიპტოზე გადასვლა გადაწყვიტა. ოქტომბერში ახალი კრიპტოპლატფორმა გაეშვა, სახელწოდებით World Liberty Financial-ი, რომელშიც აშშ-ის ამჟამინდელი პრეზიდენტი მნიშვნელოვან წილს ფლობდა. პლატფორმა დამწყებებს ტოკენებს სთავაზობდა, თუმცა შეძენის შემდეგ მფლობელებს ამ ტოკენების გადაყიდვა აღარ შეეძლოთ.
თავდაპირველად, ტრამპის კრიპტოვალუტა მომხმარებელში დიდი პოპულარობით არ სარგებლობდა, მაგრამ ეს მოცემულობა აშშ-ის საპრეზიდენტო არჩევნებში გამარჯვების შემდეგ შეიცვალა. გადასახადების გარეშე, ამ პლატფორმამ ტრამპს დაახლოებით $245 მილიონი მოუტანა. ამასთან ერთად, ინაუგურაციამდე რამდენიმე დღით ადრე, ტრამპმა თავისი ციფრული ტოკენი, $TRUMP-ი წარადგინა, ოფიციალური სახელწოდებით Official Trump-ი. ტოკენის გაშვებაზე განცხადების გაკეთებიდან დაახლოებით 36 საათის გასვლის შემდეგ ერთი მონეტის ღირებულება 1,100%-ით, $6-დან $75-მდე გაიზარდა. უცნობია, რა მოგება მიიღო ტოკენის გაშვებით ტრამპმა, თუმცა ამერიკული Forbes-ის გაანგარიშებით, მხოლოდ $TRUMP-დან პრეზიდენტმა, სავარაუდოდ, $110 მილიონი გამოიმუშავა.
თუმცა ბოლო პერიოდში ტრამპის ქონება შედარებით შემცირდა. თუ Forbes-ის ყოველწლიური რეიტინგის გამოქვეყნებისთვის, აშშ-ის მოქმედი პრეზიდენტი $5.1 მილიარდს ფლობდა, ახლა მისი ქონება $4.5 მილიარდამდეა შემცირებული. რაც შეეხება ტრამპის ტოკენს, $TRUMP-ის ერთი მონეტის ფასი ამჟამად $7.7-ს უტოლდება.
