Forbes: ყველაზე მოგებიანი სპორტული გუნდები 2025 წლისთვის

ამერიკულმა Forbes-მა 2025 წლისთვის ყველაზე მოგებიანი სპორტული გუნდები გამოავლინა. უახლესი მონაცემებით, რეიტინგის ლიდერი NFL-ის Dallas Cowboys-ია, რომლის საოპერაციო შემოსავალმა 2023 წელს $564 მილიონს მიაღწია. Dallas Cowboys-ი, ამავდროულად Forbes-ის მიერ $10.1 მილიარდით მსოფლიოს ყველაზე ძვირად ღირებულ სპორტულ გუნდადაცაა შეფასებული.

2025 წლისთვის ყველაზე მოგებიანი სპორტული გუნდების რეიტინგის სამეულშია Los Angeles Rams-ი და New England Patriots-იც, თუმცა მათი წლიური მოგება Dallas Cowboys-ის მოგების თითქმის ნახევარია და, შესაბამისად, $286 მილიონსა და $261 მილიონს უტოლდება. საერთო ჯამში, Forbes-ის სიის 20 ყველაზე მოგებიანი სპორტული გუნდიდან ცხრა NFL-ის ფრენჩაიზებზე მოდის, ხუთი – NBA-ზე, სამ-სამი – NHL-სა და ინგლისის „პრემიერ-ლიგაზე“. მათ მიერ, ბოლო სეზონზე, კოლექტიურად მიღებული მოგება $3.9 მილიარდს აღწევს, რაც თითო გუნდზე საშუალოდ $195 მილიონის მოგებას უდრის – 12%-ით მეტს, ვიდრე გასულ წელს.

მიმდინარე წლის რეიტინგში Cowboys-ის დომინირება უმეტესწილად მისი ადგილობრივი შემოსავლების დამსახურებაა. NFL-ის გუნდმა სეზონზე შიდა შემოსავლებიდან – მათ შორის ბილეთების გაყიდვა, სტადიონის შემოსავალი – $800 მილიონის მოგება მიიღო. NFL-ის სხვა არცერთ გუნდს შიდა შემოსავლებში $400-მილიონიანი ნიშნულისთვის არ გადაუჭარბებია.

ამერიკული ფეხბურთის გუნდების შემოსავალზე დადებითად ლიგის ბიზნესმოდელიც აისახება. სახელფასო ლიმიტისა და საერთო შემოსავლის წყალობით, NFL-ის გუნდების საოპერაციო შემოსავალმა 2023 წელს საშუალოდ $143 მილიონი შეადგინა. ეს ლიგის გუნდებს, მაღალი მოგების პირობებშიც კი, ხარჯების გაკონტროლებაში ეხმარება. მსგავსად, MLB-ში „კონკურენტული ბალანსის გადასახადი“ მოქმედებს, რაც ლიგის გუნდების მიერ მოთამაშეებისთვის გადაჭარბებული ხელფასების გადახდას აკონტროლებს.

განსხვავებით ევროპული კლუბებისაგან, როგორიცაა „ბარსელონა“ (2022-23 წლების სეზონი $145 მილიონის საოპერაციო ზარალი) და „პარი სენ-ჟერმენი“ ($126 მილიონის საოპერაციო ზარალი), რომლებიც მოთამაშეების ხელფასზე თანხას მკაცრი შეზღუდვების გარეშე ხარჯავენ. Forbes-ის შეფასებით, ეს ერთ-ერთი მთავარი მიზეზია, რის გამოც ეს კლუბები სხვა სპორტულ გუნდებს მნიშვნელოვნად ჩამოუვარდებიან.

მეთოდოლოგია: 20 ყველაზე მოგებიანი სპორტული გუნდის რეიტინგი დაფუძნებულია MLB-ის, MLS-ის, NBA-ს, NFL-ის, NHL-ისა და ევროპული ფეხბურთის კლუბების Forbes-ის 2024 წლის შეფასებებზე და აერთიანებს მათ მიერ უახლესი ხელმისაწვდომი სეზონისთვის მიღებულ საოპერაციო შემოსავალს. მათ შორის: 2023 წლის სეზონი MLB-ის, MLS-ისა და NFL-ისთვის; 2023-24 წლების სეზონი NBA-სა და NHL-ისთვის; 2022-23 წლების სეზონი ევროპული ფეხბურთისთვის.

რეიტინგში წარმოდგენილი თანხები მოიცავს გუნდის მიერ გამომუშავებულ თანხებს (მათ შორის სტადიონებისა და არასპორტული ღონისძიებების შემოსავლებს), თუმცა გამორიცხავს სტადიონის უძრავი ქონებისა და სხვა აქტივებში არსებული კაპიტალის ღირებულებას. მონაცემთა წყაროები ეფუძნება გუნდის აღმასრულებლების, სპორტული ბანკირებისა და ინდუსტრიის ანგარიშებს.