ეროვნული ნაკრები პროგრესირებს, თუმცა ნაკრებში საქართველოს ეროვნულ ჩემპიონატში მოასპარეზე მხოლოდ ორი ფეხბურთელია. წარმოგიდგენთ მიმდინარე სეზონში მოასპარეზე გუნდების რეიტინგებს.
ქართული ფეხბურთის გულშემატკივართა დიდი ხსნის მიზანი მიღწეულია. საქართველოს ეროვნული ნაკრები ევროპის ჩემპიონატზე ასპარეზობს. მართალია, სანაკრებო მიღწევა მაღალია, მაგრამ ასეთ წარმატებებს ვერ იზიარებს საკლუბო ფეხბურთი. ეროვნულ ჩემპიონატში მოასპარეზე კლუბები ევროტურნირების ჯგუფურ ეტაპებზე ვერ ხვდებიან.
ეროვნული ნაკრების პროგრესის მიუხედავად, ეროვნული ჩემპიონატის ასეთივე სურათი ნაკრების მთავარი მწვრთნელის, ვილი სანიოლის 26-კაციან განაცხადში ეროვნულ ჩემპიონატზე მოასპარეზე მხოლოდ ორი ფეხბურთელის ყოფნაც მეტყველებს (ბათუმის „დინამოდან“ გარემარბი გიორგი წიტაიშვილი და თბილისის „დინამოდან“ სათადარიგო მეკარე გიორგი ლორია).
საქართველოს რანგით პირველ ლიგაში ათი გუნდი ასპარეზობს, რომელთა ფეხბურთელების საერთო საბაზრო ღირებულება მიმდინარე სეზონში 118.3 მლნ ლარია. მათ შორის, ყველაზე მაღალი ღირებულების გუნდი „დინამო ბათუმია“. 2024 წლის სეზონში ზღვისპირა ქალაქის გუნდის ფეხბურთელების ღირებულება ჯამში 16.9 მლნ ლარია, რომელსაც 16.6 მლნ ლარით საქართველოს ყველაზე ტიტულოვანი გუნდი „დინამო თბილისი“ მოსდევს.
თითოეულ გუნდში ფეხბურთელის საშუალო ღირებულებით სურათი ოდნავ განსხვავებულია. ამ კუთხით პირველ ადგილზე „დინამო ბათუმია“, მაგრამ მეორეა „ტორპედო ქუთაისი“. სწორედ ქუთაისელთა რიგებშია ჩემპიონატის ყველაზე ძვირად ღირებული ფეხბურთელი გიორგი არაბიძე, რომლის ღირებულება 2.7 მლნ ლარია.
ფასის ჩემპიონები
საქართველოს ჩემპიონატის ათი ყველაზე ძვირად ღირებული ფეხბურთელი
| ფეხბურთელი | ღირებულება (მლნ ლარი) | ასაკი | გუნდი | პოზიცია |
| გიორგი არაბიძე | 2.7 | 26 | ტორპედო | შემტევი ნახევარმცველი |
| გიორგი წიტაიშვილი | 2.4 | 23 | დინამო ბთ | მარცხენა გარემარბი |
| ვლადიმერ მამუჩაშვილი | 1.8 | 26 | დინამო ბთ | ნახევარმცველი |
| აურო ალვარო კრუზ ჯუნიორი | 1.8 | 28 | ტორპედო | მარჯვენა მცველი |
| ალექსანდრე კალანდაძე | 1.5 | 23 | დინამო თბ | ცენტრალური მცველი |
| ნიკა გაგნიძე | 1.5 | 23 | დილა | ცენტრალური ნახევარმცველი |
| შოთა ნონიკაშვილი | 1.4 | 23 | იბერია 1999 | ცენტრალური ნახევარმცველი |
| გიორგი კოხრეიძე | 1.4 | 25 | იბერია 1999 | მარცხენა გარემარბი |
| გიორგი მაისურაძე | 1.4 | 22 | დინამო თბ | მარჯვენა მცველი |
| ცოტნე კაპანაძე | 1.4 | 22 | იბერია 1999 | მარჯვნეა მცველი |
შენიშვნა ინფორმაცია მოპოვებულია Transfermarkt -ისა და კრისტალბეთ ეროვნული ლიგის ვებგვერდებიდან (05.06.2024 მდგომარეობით). Transfermarkt -ზე არსებული შეფასება ევროშია, რომელიც კონვერტირებულია საქართველოს ეროვნული ბანკის ოფიციალური გაცვლითი კურსის მიხედვით, ეროვნულ ვალუტა ლარში (05.06.2024-ის მდგომარეობით 3.0416).
