NDI-ის ახალი კვლევის თანახმად, ქართველებისთვის ეროვნული დონის გამოწვევებში ყველაზე მთავარი პრობლემებია: ინფლაცია/მაღალი ფასები (37%), სამუშაო ადგილები (35%), სიღარიბე (28%), ტერიტორიული მთლიანობა (23%), პენსიები (20%), ხელფასები (11%).
უმეტესობა ამბობს, რომ, წინა წელთან შედარებით, მდგომარეობა გაუმჯობესდა ჯანდაცვის, სიტყვის თავისუფლების, ქალების უფლებებისა და განათლების კუთხით.
განათლების სისტემაში მთავარ ხარვეზად გამოკითხულები განათლების დაბალ ხარისხს (24%), მასწავლებლების/ლექტორების დაბალ კვალიფიკაციას (23%) და უნივერსიტეტებში განათლების მაღალ ფასებს (22%) ასახელებენ.
რაც შეეხება ჯანდაცვის სისტემას, უმეტესობისთვის მთავარი პრობლემა წამლების ფასები (68%), ექიმების მომსახურების ხარჯები (40%), პროფესიონალთა ნაკლებობა (28%) და წამლების დაბალი ხარისხია (28%). აღსანიშნავია, რომ წამლებისა და სერვისების მაღალი ფასები 2020 წლიდან მოყოლებული მთავარ პრობლემას წარმოადგენს.
აღსანიშნავია, რომ მენტალურ ჯანმრთელობას, დეპრესიასა და შფოთვას 68% მიიჩნევს საზოგადოების პრობლემად, თუმცა გამოკითხულთა 86%-ს მენტალური ჯანმრთელობის სპეციალისტთან მისვლაზე არ უფიქრია, მათგან 57%-მა კი არ იცოდა, ვისთვის მიემართა.
ცნობისთვის, NDI-ის კვლევა 12 ოქტომბრიდან 4 ნოემბრამდე შუალედში ჩატარდა, ინტერვიუების რაოდენობამ კი 2,068 შეადგინა.
