ისრაელში მოქმედი საერთაშორისო კომპანიების ნაწილმა ღაზის სექტორიდან „ჰამასის“ მიერ ქვეყანაზე თავდასხმის გამო ოპერაციები შეაჩერა ან საკუთარ თანამშრომლებს დისტანციურად მუშაობის შესაძლებლობა მისცა. სტატიაში მოგიყვებით, თუ როგორ რეაგირებენ გლობალური ფირმები აღნიშნულ კონფლიქტზე.
მოგზაურობა
თელ-ავივის მიმართულებით დაგეგმილი ფრენები მრავალმა აზიურმა, ევროპულმა და ამერიკულმა ავიაკომპანიამ გააუქმა.
ამერიკულმა ავიაკომპანია Delta Air-მა ფრენები 31 ოქტომბრამდე გააუქმა. ისრაელური ავიაკომპანია El Al-ი კი ისრაელელი რეზერვისტების სამშობლოში დასაბრუნებლად დამატებით ფრენებს ასრულებს.
საკრუიზო ოპერატორებმა, Royal Caribbean-მა, Carnival-მა და Norwegian Cruise-მა საკუთარი მარშრუტები შეცვალეს.
ენერგოსექტორი
ისრაელის ენერგეტიკის მინისტრმა, აშშ-ის მეორე ყველაზე მსხვილ, ნავთობისა და ბუნებრივი აირის მწარმოებელ Chevron-ს, ქვეყნის ჩრდილოეთ სანაპიროზე არსებული ბუნებრივი აირის საბადოს, Tamar-ს დროებით დახურვა უბრძანა.
საბანკო სექტორი
Goldman Sachs-მა, Morgan Stanley-მ და JPMorgan Chase-მა თელ-ავივში მომუშავე თანამშრომლები დისტანციურ რეჟიმზე გადაიყვანა. Bank of America-მ კი თელ-ავივის ოფისი დროებით დახურა.
CitiGroup-მა, რომელიც ისრაელში უცხოურ ფინანსურ ინსტიტუტებს შორის ყველაზე მსხვილია, თანამშრომლებს დისტანციურ და არადისტანციურ რეჟიმებს შორის არჩევანის გაკეთების შესაძლებლობა მისცა.
ლოგისტიკა
ისრაელის ჩრდილოეთით არსებული პორტი, Adani Ports-ი, რომელიც ინდოელ მილიარდერ გაუტამ ადანის ეკუთვნის, კვლავ აგრძელებს ფუნქციონირებას.
FedEx-მა ქვეყანაში საკუთარი სერვისები დროებით შეაჩერა. UPS-მა ქვეყნიდან და ქვეყნის მიმართულებით ფრენები აკრძალა.
ტექნოლოგიური სექტორი
Nvidia-მ თელ-ავივში დაგეგმილი AI-ის სამიტი, რომელზეც კომპანიის აღმასრულებელი დირექტორიც უნდა ჩასულიყო, გააუქმა.
საცალო ვაჭრობა
H&M-მა და Zara-მ ისრაელში მაღაზიები დროებით დახურეს.
ფარმაცევტული სექტორი
ფარმაცევტული კომპანია Eli Lilly and Co კვლავ განაგრძობს ფუნქციონირებას და აკვირდება მოვლენათა განვითარებას თანამშრომლების უსაფრთხოების უზრუნველსაყოფად. კომპანია რეგიონისთვის მედიკამენტების შეუფერხებლად მიწოდებას აგრძელებს.
