2023 წლის პირველ ნახევარში გამოსული ახალი ფილმების ნაწილი როგორც დამოუკიდებელ წარმოებას, ასევე წამყვან სტუდიებს ეკუთვნოდათ, რაც კიდევ ერთხელ მიუთითებს კინოთეატრებში მაღალი ხარისხის კონტენტის არსებობაზე. მიმდინარე წელს გამოშვებული ფილმების დიდი ნაწილი კი პოპულარულ სტრიმინგ-პლატფორმა Netflix-ზე გამოჩნდა, რომლის ათეულიც გამოცემა Forbes-მა შეადგინა.
კაცი, სახელად ოტო | A Man called Otto
ფილმში სიუჟეტი მუდამ ყველაფრით უკმაყოფილო ქვრივის, ოტოს გარშემო ვითარდება, რომელსაც ცხოვრებაზე ხელი აქვს ჩაქნეული. თუმცა მისი ცხოვრება მეზობლად ახალი ოჯახის გადმოსვლის შემდეგ რადიკალურად იცვლება. მარკ ფოსტერის რეჟისორობით გადაღებული ფილმი ეკრანებზე 2023 წლის იანვრიდან გამოჩნდა. მთავარ როლებს ტომ ჰენქსი, მარიანა ტრევინიო, ტრუმენ ჰენქსი, რეიჩელ კელერი, მაკ ბაიდა და მანუელ-გარსია რულფო ასრულებენ.
შიმშილი | Hunger
ფილმში ვითარება ბანგკოკის ძველ კვარტალში მიმდინარეობს და აიოს ელექტრიფიცირებულ კულინარიულ მოგზაურობაზე მოგვითხრობს, რომელიც მოულოდნელად ტაილანდის ყველაზე პატივსაცემი შეფ-მზარეულის ჯგუფში,Hunger-ში მოხვდება. ტაილანდური დრამა მიმდინარე წლის აპრილში გამოვიდა, ფილმის რეჟისორი სიტისირი მონგკოლსირია, მთავარ როლებს კი ნოპოჩაი ჩაიიანამი და ჩუტიმონ ჩუენჩანვენსუკინი ასრულებენ.
დედა | The Mother
ჯენიფერ ლოპესის მონაწილეობით გადაღებული ამერიკული მძაფრსიუჟეტიანი ფილმი ზუსტად დედის დღისთვის, მაისის პირველ ნახევარში გამოვიდა. ახალ ნამუშევარში ლოპესი დაქირავებული მკვლელის როლს ასრულებს, რომელიც სასტიკი კანონდამრღვევებისგან თავისი შვილის დაცვას ცდილობს. ფილმის რეჟისორი ნიკი კაროა, მთავარ როლებს ჯენიფერ ლოპესი, ჯოზეფ ფაინსი, ლუსი პაეზი, ომარი ჰარდვიკი, პოლ რაჯი და გაელ გარსია ბერნალი თამაშობენ.
უკანასკნელი სამეფო: შვიდი მეფე უნდა მოკვდეს | The Last Kingdom: Seven Kings Must Die
ფილმი ინგლისის მეფე ედუარდის დაღუპვის შემდგომ განვითარებულ დაპირისპირებებსა და ძალაუფლებისთვის ბრძოლაზე მოგვითხრობს. არეულობის ფონზე კი უთრედი და მისი მეგობრები ინგლისის საბოლოოდ გასაერთიანებლად იბრძვიან. ისტორიული დრამა ეკრანზე მიმდინარე წლის აპრილში გამოჩნდა, რეჟისორი ედვარდ ბეზელგეტია. მთავარ როლებს ალექსანდერ დრეიმონი, ჰარი გილბი, მარკ როული და არნას ფედერავიჩუსი ასრულებენ.
დაკარგული | Missing
დედის გაუჩინარების შემდეგ ჯუნი ლოს-ანჯელესიდან კოლუმბიაში სამაშველო მისიას იწყებს. დედის საპოვნელად ჯუნი უახლოეს ტექნოლოგიებს იყენებს, თუმცა გამოძიების მსვლელობისას ციფრულ ლაბირინთში ღრმად იძირება და ახალ საიდუმლოებასაც აღმოაჩენს. ფილმის რეჟისორები უილ მერიკი და ნიკ ჯონსონი არიან, მთავარ როლებს სტორმ რიდი, ჟოაკიმ დე ალმეიდა, დენიელ ჰენი, კენ ლიუნგი და ნია ლონგი ასრულებენ. ამერიკული ტრილერი ეკრანებზე 2023 წლის იანვარში გამოჩნდა.
Whitney Houston: I Wanna Dance with Somebody
ახალი ბიოგრაფიული ნამუშევარი, 1980-იან წლებში, კლაივ დევისის მიერ ფენომენალური ვოკალისტის, უიტნი ჰიუსტონის აღმოჩენის, მისი ცხოვრებისა და კარიერის შესახებ მოგვითხრობს. ფილმის რეჟისორი კასი ლემონსია, მთავარ როლებს ნაომი აკი, სტენლი ტუჩი, აშტონ სანდერი, ტამარა ტუნი, ნაფესა უილიამსი და კლარკ პიტერსი ასრულებენ.
იდუმალი მკვლელობა 2 |Murder Mystery 2
„იდუმალ მკვლელობა 2“-ში ნიკ და ოდრი შპიცები, წარსულში კეთილსინდისიერი მოქალაქეები, საკუთარ კერძო დეტექტიურ სააგენტოს ხსნიან და მეგობრის გაუჩინარების შემდეგ, შეთქმულებებითა და საშიშროებებით სავსე საერთაშორისო საზოგადოებაში აღმოჩნდებიან. ფილმის რეჟისორი ჯერემი გარელიკია, მთავარ როლებს ადამ სენდლერი, ჯენიფერ ენისტონი და მარკ სტრონგი თამაშობენ.
ჯადოქრის სპილო | The Magician’s Elephant
2023 წლის Netflix-ის საუკეთესო ფილმების სერიას ანიმაციური ფილმი „ჯადოქრის სპილო“ აგრძელებს. ახალი ნამუშევარი ობოლი ბიჭის შესახებ გვიყვება, რომელიც თავის დაკარგულ დას ეძებს, რაშიც მას მისტიკური სპილო ეხმარება. ანიმაციის რეჟისორი ვენდი როჯერსია, წამყვან პერსონაჟებს კი ნოა იუპი, მენდი პეტინკინი, ნატაშა დემეტრიუ, ბენედიქტ ვონდი და სხვები ახმოვანებენ.
შვილი | The Son
ტინეიჯერი შვილის, ნიკოლასის კრიზისული ცხოვრება პიტერში მამობრივ ინსტინქტებს აღძრავს. ის ცდილობს, შვილი ისე აღზარდოს, როგორც მას სურდა, მამამისს რომ მასზე ეზრუნა. ფლორიან ზელერის რეჟისორობით გადაღებულ ფილმში ჰიუ ჯეკმანი, ლორა დერნი, ვანესა კირბი, ზენ მაკგრატი და ენტონი ჰოპკინსი მონაწილეობენ.
ქალი მეფე | The Woman King
ფილმი აფრიკული სამეფო დოჰეიმის დასაცავად გაერთიანებული, მეომარი ქალებისგან შემდგარი ჯგუფის შესახებ მოგვითხრობს. ჯინა პრინს-ბიტვუდის რეჟისორობით შექმნილი ამერიკული დრამა კინოეკრანებზე ძლიერი და სასტიკი ქალების გამოსახვის ახალ ეტალონს აყენებს. მთავარ როლებში ვხვდებით ვიოლა დევისს, ტუსო მბედუს, ლაშანა ლინჩს, შეილა ატიმს, ჰერო ფიენს ტიფინსა და ჯონ ბოიეგას.
