ამერიკულმა ტექნოლოგიურმა გიგანტმა, Apple-მა ინდოეთში პირველი ოფიციალური მაღაზია გახსნა, რითაც სიდიდით რიგით მეხუთე ეკონომიკაში საკუთარი გავლენის გაზრდას გეგმავს. მსოფლიოს ყველაზე ძვირად ღირებული კომპანიის გეგმების მასშტაბს ცხადყოფს ისიც, რომ ქვეყანაში პირველი მაღაზია, რომელიც ინდოეთის უდიდესი ქალაქის, მუმბაის ფინანსურ ცენტრში მდებარეობს, Apple-ის აღმასრულებელმა ხელმძღვანელმა, ტიმ კუკმა თავად გახსნა.
ინდოეთში მაღაზიის გახსნა, პირდაპირ უკავშირდება Apple-ის მიერ ქვეყანაში წარმოების გაზრდას, რასაც, თავის წილ, ტექნოლოგიური გიგანტის მიერ ჩინეთზე დამოკიდებულების შემცირების სტრატეგია განაპირობებს. Apple-ის ჩინური ვექტორის ცვლილებას რამდენიმე მიზეზი აქვს. პირველი, პოლიტიკურია და ის ამერიკის შეერთებულ შტატებსა და ჩინეთს შორის გართულებულ ურთიერთობას უკავშირდება, რომელიც, თეორიულად, ნებისმიერ დროს შეიძლება დაიძაბოს, როგორც ტაივანის, ასევე უკრაინის გარშემო არსებული მოვლენების გამო. ამასთან, კოვიდ-19-ის შემთხვევების მიმართ ნულოვანი პოლიტიკისა და ქარხნებში ხშირი პროტესტების გამო, ბოლო წლებში, ჩინეთი საწარმოო ბიზნესისთვის მეტად არასტაბილურ ქვეყნად იქცა.
ტიმ კუკის მიერ ინდოეთში ოფიციალური ვიზიტით ჩასვლა სიმბოლურია იმითაც, რომ გასულ ფისკალურ წელს, Apple-მა, ინდოეთში $7 მილიარდის ღირებულების iPhone-ები ააწყო, რაც სამჯერ მეტია, ვიდრე ერთი წლით ადრე. დღეს, ინდოეთზე Apple-ის ყველაზე გაყიდვადი მოწყობილობის, iPhone-ის წარმოების 7% მოდის, რასაც ამერიკული გიგანტი Foxconn-თან და Pegatron-თან თანამშრომლობით ახერხებს.
ინდური წარმოების საგრძნობლად გაზრდა, ცხადია, დადებითი მოვლენაა ინდოეთისთვისაც, რომელზეც 2021 წელს, iPhone-ების გლობალური წარმოების მხოლოდ 1% მოდიოდა. ამასთან, ინდოეთის უზარმაზარი ბაზრის ათვისებას Apple-ი მხოლოდ ახლა ცდილობს და ამაზე რიცხვებიც მეტყველებს – Bloomberg-ის ინფორმაციით, ინდოეთში 700 მილიონზე მეტი სმარტფონი გამოყენება და Apple-ზე ამ ბაზრის მხოლოდ 4%-იანი წილი მოდის. ამასთან, გასულ ფისკალურ წელს, Apple-მა ინდოეთში $6 მილიარდის ღირებულების მოწყობილობები გაყიდა, რაც თითქმის 50%-ით მეტია, ვიდრე ერთი წლით ადრე.
პარალელურად ამისა, ინდოეთის პრემიერ-მინისტრი, ნარენდრა მოდი მსოფლიოს ყველაზე ძვირად ღირებულ კომპანიას მეტად საინტერესო საგადასახადო შეღავათებს სთავაზობს, ასე რომ Apple-ის მიერ ინდოეთში წარმოების დიდი ნაწილის გადატანა სავსებით ლოგიკურიცაა. ქვეყანაში განვითარების პარალელურად, Apple-ი აქტიურადაა ჩართული ინდური შრომის სამართლის რეგულირებაშიც ლობირების გზით.
საინტერესოა, რომ თუ ინდოეთის ბაზრის ათვისება Apple-მა ამავე ტემპებით განაგრძო, 2025 წლისთვის, iPhone-ების მეოთხედი სწორედ ინდოეთში იქნება აწყობილი. დღეს, iPhone-ებს ინდოეთში სამი კომპანია აწყობს – Foxconn-ი, Wistron-ი და Pegatron-ი, რომლებიც, ჯამში, სამოცი ათას ადამიანს ასაქმებენ. ანალიტიკოსების ვარაუდით, შემდეგი ათწლეულის განმავლობაში, Apple-ის გაყიდვები ინდოეთში 17%-ით გაიზრდება და ამ მიმართულებით, მთავარ როლს ინდოეთის მზარდი საშუალო კლასი ითამაშებს.
მუმბაის შემდეგ, Apple-ი ინდოეთში კიდევ ერთი მაღაზიის გახსნას გეგმავს, ამჯერად, ინდოეთის დედაქალაქ ნიუ-დელიში, სადაც უკანასკნელი კვლევით, 16.8 მილიონი ადამიანი ცხოვრობს.
