კორონავირუსის პანდემიის გავლენიდან თავის დაღწევის ფონზე, შეიძლება ითქვას, რომ გასული წელი კინოინდუსტრიისთვის წარმატებული აღმოჩნდა. ამას ისიც მოწმობს, რომ 2022 წელს გამოსული ფილმებიდან ერთმა, Avatar: The Way of Water-მა $2-მილიარდიანი ნიშნული გადაკვეთა და ყველა დროის ყველაზე მაღალშემოსავლიანი კინოსურათების ტოპ-10-ეულში შესვლა შეძლო. ბოლო მონაცემებით, ის ჩამონათვალში მე-6 ადგილს იკავებს, თუმცა, ვინაიდან ფილმის ჩვენება ჯერ კიდევ მიმდინარეობს, სიაში Avatar 2-ის დაწინაურებას კიდევ უნდა ველოდოთ.
Avatar: The Way of Water-ის მიერ მიღწეული წარმატების წყალობით ჯეიმს კამერონი გახდა პირველი რეჟისორი, რომლის სამმა ფილმმა გლობალური შემოსავლებით $2-მილიარდიანი ნიშნული გადაკვეთა. Avatar-ის ორივე ნაწილთან ერთად ის ასევე არის 1997 წელს გამოსული Titanic-ის რეჟისორიც, რომლის მიერ მიღებული გლობალური შემოსავალი $2.195 მილიარდს შეადგენს. აქვე გეტყვით, რომ Avatar-ის პირველი ნაწილის ბილეთების გაყიდვით მიღებული თანხა $2.923 მილიარდს უტოლდება და ამ შედეგით ის ყველა დროის ყველაზე მაღალშემოსავლიანი ფილმია.
გარდა ზემოთქმულისა, Avatar: The Way of Water-ის მიერ ნაჩვენები შედეგის მეშვეობით, ზოი სალდანა გახდა პირველი მსახიობი, რომელსაც შემოსავლების კუთხით $2-მილიარდიანი ნიშნულის გადამლახავ ოთხ ფილმში აქვს მონაწილეობა მიღებული. Avatar-ის ორ ნაწილთან ერთად, ეს კინოსურათებია: Avengers: Infinity War-ი ($2.052 მილიარდი) და Avengers: Endgame-ი ($2.798 მილიარდი).
2022 წლის მეორე, საკმაოდ წარმატებული ფილმი, ტომ კრუზის მონაწილეობით გადაღებული Top Gun: Maverick-ია, რომელმაც შემოსავლებით $1-მილიარდიანი ნიშნული გადაკვეთა. ეს კინოსურათი გახდა ყველაზე მაღალშემოსავლიანი ფილმი, რომელშიც კრუზს მონაწილეობა აქვს მიღებული. ცნობისთვის, ყველა დროის ყველაზე მაღალშემოსავლიანი ფილმების ჩამონათვალში Top Gun: Maverick-ი ამჟამად მე-12 ადგილს იკავებს.
გასულ წლის ფილმებიდან მსოფლიო კინოთეატრების სალაროებში ბილეთების გაყიდვით $1-მილიარდიანი ნიშნულის გადალახვა კიდევ ერთმა კინოსურათმა, Jurassic World: Dominion-მა შეძლო.
აღსანიშნავია, რომ 2022 წელს გამოსული ფილმებიდან გლობალური შემოსავლების თვალსაზრისით ტოპ-10-მა კინოსურათმა საერთო ჯამში 9.9 მილიარდი აშშ დოლარის შეგროვება შეძლო.
წარმოგიდგენთ 2022 წლის ტოპ–10 მაღალშემოსავლიან ფილმს:
#1 Avatar: The Way of Water
შემოსავალი: $2,028,256,415
ბიუჯეტი: $350-$460 მილიონი
#2 Top Gun: Maverick
შემოსავალი: $1,488,732,821
ბიუჯეტი: $170 მილიონი
#3 Jurassic World: Dominion
შემოსავალი: $1,001,978,080
ბიუჯეტი: $165-$185 მილიონი
#4 Doctor Strange in the Multiverse of Madness
შემოსავალი: $955,775,804
ბიუჯეტი: $200 მილიონი
#5 Minions: The Rise of Gru
შემოსავალი: $939,628,210
ბიუჯეტი: $80 მილიონი
#6 Black Panther: Wakanda Forever
შემოსავალი: $840,239,879
ბიუჯეტი: $250 მილიონი
#7 The Batman
შემოსავალი: $770,945,583
ბიუჯეტი: $185-$200 მილიონი
#8 Thor: Love and Thunder
შემოსავალი: $760,928,081
ბიუჯეტი: $250 მილიონი
#9 Water Gate Bridge
შემოსავალი: $626,571,697
ბიუჯეტი: უცნობი
#10 Moon Man
შემოსავალი: $460,237,662
ბიუჯეტი: უცნობი
მონაცემები აღებულია boxofficemojo.com-იდან.
