სწრაფი კვების რესტორნების ამერიკული ჰოლდინგი Yum! Brands-ი, რომელიც KFC-ს, Pizza Hut-სა და Taco Bell-ს ფლობს, რუსეთის ფედერაციის ბაზარს საბოლოოდ ტოვებს.
Yum-ის განცხადებით, ქსელური რესტორნები და ფიზიკური აქტივები რუსულ კომპანია Smart Service Ltd-ზე გაიყიდება, რომელიც ამჟამად KFC-ის ფრენჩაიზის ოპერატორია.
აღსანიშნავია, რომ გარიგების ზუსტი მოცულობა და დეტალები ჯერ გასაჯაროებული არ არის, ტრანზაქციის ოფიციალურად დასასრულებლად კი მარეგულირებელი ორგანოს მხრიდან თანხმობის მიღებაა აუცილებელი. ამ პროცესის დასრულების შემდეგ, Yum-ი რუსეთში ოპერირებას საბოლოოდ შეწყვეტს.
საერთო ჯამში, Yum-ის ბრენდების სახელით რუსეთის მასშტაბით 1,000-მდე რესტორანი ოპერირებდა, კომპანიის ქვეყნიდან გასვლის შემდეგ კი, კონტრაქტორებს რებრენდინგი და KFC-ის, Pizza Hut-ისა თუ Taco Bell-ის სახელების შეცვლა მოუწევთ, ისევე როგორც ეს McDonald’s-ის შემთხვევაში მოხდა.
კომპანია Smart Service-ის უკან რუსი მეწარმეები, კონსტანტინ კოტოვი და ანდრეი ოსკოლკოვი დგანან, რომლებიც წლების განმავლობაში KFC-ის ფრენჩაიზის ოპერატორების იყვნენ.
ცნობისთვის, Yum-ის საბაზრო კაპიტალიზაცია 31 მილიარდ დოლარს შეადგენს, ზემოხსენებული სიახლე კი კომპანიის ინვესტორებმა შედარებით ნეგატიურად მიიღეს – საფონდო ბირჟაზე Yum-ის აქციების ღირებულება თითქმის 2%-ით დაეცა.
