ამერიკულმა Forbes-მა 2022 წლის მსოფლიოს ყველაზე მაღალშემოსავლიანი ფეხბურთელების რეიტინგი გამოაქვეყნა. აღსანიშნავია, რომ წელს სიის სათავეში არა კრიშტიანუ რონალდუ ან ლიონელ მესი, არამედ ფრანგი კილიან მბაპეა მოქცეული. გამოცემის შეფასებით, ეს უკანასკნელი 2022-23 წლების სეზონში 128 მილიონ აშშ დოლარს გამოიმუშავებს გადასახადებისა და აგენტების ხარჯის გამოკლებით, რაც Forbes-ის ყოველწლიურ რეიტინგში რეკორდული მაჩვენებელია.
უნდა ითქვას, რომ კრიშტიანუ რონალდუმა და მესიმ წლიური შემოსავლის $100-მილიონიანი ზღვარი 30 წელზე უფროს ასაკში გადალახეს, ფრანგმა ფეხბურთელმა კი ეს 23 წლის ასაკში შეძლო.
სფეროს ექსპერტების აზრით, მბაპეს გარიგებების პირობების თანახმად, რომელიც, ისევე როგორც საფეხბურთო კონტრაქტების უმეტესობა საჯაროდ ცნობილი არ არის, ფრანგი მიმდინარე სეზონში დაახლოებით 110 მილიონ აშშ დოლარს დააგროვებს ხელფასისა და პრემიის წყალობით. ამას, სავარაუდოდ, დაემატება 18 მილიონი აშშ დოლარი, რომელსაც მბაპე ყოველწლიურად იღებს პარტნიორებისგან, მათ შორის Nike-ისგან, Dior-ისგან, Hublot-ისგან, Oakley-სა და Panini-სგან.
რაც შეეხება მოედანს გარეთ სხვა აქტივობებს, მბაპე ზედიზედ უკვე მესამე წელია, რაც EA Sports-ისა და FIFA-ს ვიდეოთამაშის გარეკანზე ჩნდება. მან ასევე დააარსა საკუთარი საპროდიუსერო კომპანია Zebra Valley და შეუერთდა NFT-პლატფორმა Sorare-ს, როგორც ელჩი და ინვესტორი.
აღსანიშნავია, რომ 2014 წლიდან მოყოლებული Forbes-ის რეიტინგში პირველ ორ ადგილს მესი და რონალდუ ინაწილებდნენ, ახლა კი, შესაბამისად, მეორე და მესამე პოზიციას იკავებენ. აქვე უნდა ითქვას, რომ არგენტინელმა გამოცემის მიერ მაისში გამოქვეყნებულ ყველაზე მაღალშემოსავლიანი სპორტსმენის რეიტინგში პირველი ადგილი დაიკავა, თუმცა აღნიშნული სიის შედგენისას გამოყენებული მონაცემები სხვა პერიოდის, გასული 12 თვის შედეგებს ეყრდნობა.
აუცილებლად უნდა ვახსენოთ ნორვეგიელი ერლინგ ჰაალანდი, რომელიც Forbes-ის ყველაზე მაღალშემოსავლიანი ფეხბურთელების ათეულში წელს პირველად გამოჩნდა. გამოცემის დათვლებით, „მანჩესტერ სიტის“ 22 წლის მოთამაშე მიმდინარე სეზონში საერთო ჯამში 39 მილიონი აშშ დოლარის გამომუშავებას შეძლებს.
Forbes-ის შეფასებით, ათი ყველაზე მაღალშემოსავლიანი ფეხბურთელი მიმდინარე სეზონში, სავარაუდოდ, მთლიანობაში 652 მილიონ აშშ დოლარს შეაგროვებს, რაც შარშანდელ მაჩვენებელზე ($585 მილიონი) 11%-ით მეტია. საყურადღებოა, რომ მხოლოდ პირველ სამ ფეხბურთელზე ათეულის მთლიანი შემოსავლის 50%-ზე მეტი მოდის.
Forbes-ის 2022 წლის ყველაზე მაღალშემოსავლიანი ფეხბურთელების ათეული ასე გამოიყურება:
- კილიან მბაპე („პარი სენ-ჟერმენი) – $128 მილიონი
მოედანზე გამომუშავებული თანხა: $110 მილიონი
მოედნის გარეთ გამომუშავებული თანხა: $18 მილიონი
- ლიონელ მესი („პარი სენ-ჟერმენი“) – $120 მილიონი
მოედანზე გამომუშავებული თანხა: $65 მილიონი
მოედნის გარეთ გამომუშავებული თანხა: $55 მილიონი
- კრიშტიანუ რონალდუ („მანჩესტერ იუნაიტედი“) – $100 მილიონი
მოედანზე გამომუშავებული თანხა: $40 მილიონი
მოედნის გარეთ გამომუშავებული თანხა: $60 მილიონი
- ნეიმარი („პარი სენ-ჟერმენი“) – $87 მილიონი
მოედანზე გამომუშავებული თანხა: $55 მილიონი
მოედნის გარეთ გამომუშავებული თანხა: $32 მილიონი
- მოჰამედ სალაჰი („ლივერპული“) – $53 მილიონი
მოედანზე გამომუშავებული თანხა: $35 მილიონი
მოედნის გარეთ გამომუშავებული თანხა: $18 მილიონი
- ერლინგ ჰაალანდი („მანჩესტერ სიტი“) – $39 მილიონი
მოედანზე გამომუშავებული თანხა: $35 მილიონი
მოედნის გარეთ გამომუშავებული თანხა: $4 მილიონი
- რობერტ ლევანდოვსკი („ბარსელონა“) – $35 მილიონი
მოედანზე გამომუშავებული თანხა: $27 მილიონი
მოედნის გარეთ გამომუშავებული თანხა: $8 მილიონი
- ედენ აზარი („მადრიდის რეალი“) – $31 მილიონი
მოედანზე გამომუშავებული თანხა: $27 მილიონი
მოედნის გარეთ გამომუშავებული თანხა: $4 მილიონი
- ანდრეს ინიესტა („ვისელი“) – $30 მილიონი
მოედანზე გამომუშავებული თანხა: $25 მილიონი
მოედნის გარეთ გამომუშავებული თანხა: $5 მილიონი
- კევინ დე ბრუინი („მანჩესტერ სიტი“) – $29 მილიონი
მოედანზე გამომუშავებული თანხა: $25 მილიონი
მოედნის გარეთ გამომუშავებული თანხა: $4 მილიონი
