ამერიკული ტექნოლოგიური გიგანტი დისტანციური მუშაობის ერას ასრულებს, კომპანია Apple-ის თანამშრომლები სექტემბრიდან ოფისებს უნდა დაუბრუნდნენ და კვირაში მინიმუმ სამი დღე სწორედ იქ გაატარონ.
ახალი ჰიბრიდული რეჟიმის ფარგლებში, თანამშრომლები ვალდებული იქნებიან, სამშაბათსა და ხუთშაბათს ოფისში იმუშაონ, მესამე დღის არჩევა კი მათ ინდივიდუალურად შეეძლებათ.
აღნიშნული გადაწყვეტილება იმაზე მიუთითებს, რომ კომპანიის მენეჯმენტი დისტანციური მუშაობის შედეგებით უკმაყოფილოა. ასევე გასათვალისწინებელია, რომ Apple-ს პირადი შეხვედრებისა და თანამშრომლების წინაშე ინტერაქციული პრეზენტაციების ჩატარების მრავალწლიანი კორპორაციული ტრადიცია აქვს, რომელიც კომპანიის წარმატების ერთ-ერთი განმაპირობებელი ფაქტორია, მის შენარჩუნებას კი მენეჯმენტი პრიორიტეტულად მიიჩნევს.
საგულისხმოა, რომ თანამშრომელთა ნაწილი ოფისებში დაბრუნებას აპროტესტებს, რადგან მათთვის ხელსაყრელია ე.წ. „ციფრული ნომადობა“, რაც იმას გულისხმობს, რომ ისინი სასურველ ადგილას ცხოვრობენ და ონლაინ-რეჟიმში მუშაობენ, რისი საშუალებაც მათ სექტემბრიდან აღარ ექნებათ.
