საინვესტიციო ჯგუფ Revery-ს კომპანია „პეპსი ჯორჯია“ სრული განახლების პროცესს გადის. კომპანიამ ტრანსფორმაცია 2021 წელს ახალი გუნდის შეკრებით დაიწყო. განახლებული გუნდის წევრებს საქართველოს ბიზნეს სექტორში მუშაობის დიდი გამოცდილება აქვთ და მათ მიერ დაგროვილი ცოდნა კომპანიის წინსვლას მნიშვნელოვნად შეუწყობს ხელს.
„ჩვენი მიზანია, გავხდეთ საქართველოს ლიდერი კომპანია გამაგრილებელი სასმლის წარმოების მიმართულებით. გვყავს ახალი, ძალიან კარგი გუნდი, რომლის წევრებსაც ამ სექტორის წარმატებულ კომპანიებში მუშაობის მრავალწლიანი გამოცდილება აქვთ. ვამაყობთ და გვიხარია, რომ პეპსი ჯორჯიას გუნდს შევუერთდით და კომპანიის განახლების პროცესში ვიღებთ მონაწილეობას,“- ამბობს „პეპსი ჯორჯიას“ კომერციული დირექტორი დავით გელაშვილი. ის „პეპსი ჯორჯიას“ 2021 წლის შემოდგომაზე შეუერთდა. საქართველოში მოქმედი დიდი და წარმატებული FMCG კომპანიების ყოფილი წარმომადგენელი ახლა „პეპსი ჯორჯიას“ განახლების პროცესის ერთ-ერთი კურატორია.
„პეპსი ჯორჯიას“ ახალი მთავარი მენეჯერი გურგენ არუთუნიანია, რომელსაც მენეჯერულ პოზიციებზე მუშაობის მრავალწლიანი გამოცდილება აქვს, მათ შორის 8 წელი PepsiCo-ს სხვადასხვა წარმომადგენლობაში მუშაობდა.
„იმისათვის, რომ დასახულ მიზნებს მივაღწიოთ, ჩვენ უნდა გავხდეთ საუკეთესო კომპანია ქვეყანაში გაყიდვებისა და დისტრიბუციის მიმართულებით, თანამედროვე საწარმოო ობიექტებითა და უნაკლო მომსახურებით. ეს საშუალებას მოგვცემს, ვასიამოვნოთ ქართველი მომხმარებლები და მათ ინოვაციური პროდუქტები შევთავაზოთ. ეს არის გრძელი გზა და ვფიქრობთ, მის გავლას 5 წელიწადში მოვახერხებთ,“ – აცხადებს გურგენ არუთუნიანი.
„იბერია რეფრეშმენტსი“, იგივე „პეპსი ჯორჯია“ PepsiCo-ს ბრენდების ოფიციალური იმპორტიორი და დისტრიბუტორი 2001 წელს გახდა. 2003 წელს კი კომპანიამ მოახერხა და საქართველოში პეპსის ქარხანაც გახსნა. ამ ეტაპზე, „იბერია რეფრეშმენტსი“ სწრაფად მზარდი საინვესტიციო პლატფორმის, Revery-ს შემადგენლობაშია. აღნიშნული საინვესტიციო ჯგუფი ევრაზიის ტერიტორიაზე PepsiCo-ს ყველაზე დიდი პარტნიორია, აქვს ფრანჩიზა და ახდენს პროდუქტის დისტრიბუციას უზბეკეთში, საქართველოსა და სომხეთში.
„უფრო დიდი, უფრო ძლიერი და უკეთესი“ – Revery-ს ეს სლოგანი ხაზს უსვამს „პეპსი ჯორჯიას“ მიზნებსაც. ამ ეტაპზე, „პეპსი ჯორჯიაში“ 500-მდე ადამიანია დასაქმებული. თუმცა, კომპანია გეგმავს, რომ მომდევნო 5 წლის განმავლობაში, ქვეყანაში საუკეთესო დამსაქმებლის ტიტული მოიპოვოს. ამისათვის კი, „პეპსი ჯორჯია“ ეთიკისა და სამუშაო პირობების უმაღლეს სტანდარტებს ნერგავს და, პარალელურად, ფოკუსირებულია მომხმარებლის ინტერესებზეც.
ცოტა ხნის წინ, Revery-მ ჰოლდინგის ახალი მიზნის შესახებაც განაცხადა – შექმნას შესაძლებლობების ჰაბი კავკასიის რეგიონში, რათა ადამიანებს კარიერულ განვითარებაში დაეხმაროს. Revery გეგმავს, გამოცდილება და პრაქტიკა გააზიაროს იმ სივრცეებში, სადაც ოპერირებს. გასულ წელს საინვესტიციო ჯგუფმა ერევანში ახალი, 4 სართულიანი ულტრათანამედროვე ოფისი გახსნა, რითიც ერთ სივრცეში ოპერირების პრაქტიკა დანერგა. Revery-ს გუნდი მოტივირებულია, შექმნას საერთო სამუშაო სივრცეები და გარემო, სადაც ადამიანებს თავიანთ კომპანიებში კარიერული განვითარების საშუალება ექნებათ.
