VILI ონლაინ აგრო ჰიპერმარკეტია, რომელიც ბევრ სხვადასხვა ტიპის პროდუქტს აერთიანებს, თუმცა კი აქცენტს ქართულ ფერმერულ ნაწარმზე აკეთებს. მისი შექმნის იდეა პანდემიის პერიოდში გაჩნდა, როცა საკვები პროდუქტებისა და სხვა სამომხმარებლო ნივთების შინიდან გაუსვლელად შეძენასა და მიტანის სერვისზე მოთხოვნა მკვეთრად იყო გაზრდილი.
დღეს უკვე VILI წარმატებით ოპერირებს თბილისის მასშტაბით და სულ მალე გაფართოებას გეგმავს. ვრცლად სტარტაპის შესახებ მისი თანადამფუძნებელი, ლაშა სტურუა გვესაუბრა:
იდეა
VILI-ს ისტორია პანდემიის დასაწყისს უკავშირდება. შევამჩნიეთ, რომ რეალობა იცვლებოდა და ამასთან, ცხოვრების სტილი და მომხმარებლის ქცევაც სხვაგვარი ხდებოდა.
მოთხოვნა განსაკუთრებით გაიზარდა პროდუქტების გაუსვლელად შეძენასა და მიტანის სერვისზე, რამაც, შესაბამისად, გაზარდა უკვე არსებული ონლაინ სავაჭრო პლატფორმების დატვირთვა, წარმოქმნა პროდუქციის დეფიციტი, ფასების ზრდა და ახალი ონლაინ სუპერმარკეტების საჭიროებაც.
გადავწყვიტეთ, შეგვექმნა ისეთი ონლაინ სივრცე, რომელიც იმ დროისთვის არსებულ გამოწვევებს უპასუხებდა, თუმცა, ეს გამოწვევები დღესაც აქტუალურია. რამდენიმეთვიანი მუშაობის შემდეგ, 2021 წლის იანვრის ბოლოს ჩავუშვით ჩვენი ონლაინ პლატფორმა და პირველი შეკვეთები მივიღეთ. ჩვენი საქმიანობის მთავარ მიმართულებას ონლაინ ჰიპერმარკეტი წარმოადგენს, სადაც განთავსებულია როგორც ყოველდღიური მოხმარების ნივთები, ასევე ფერმერული მიმართულების პროდუქცია.
VILI
ვილი მომხმარებლებს აძლევს შესაძლებლობას, სახლიდან გაუსვლელად, ყოველგვარი დროითი დანაკარგის გარეშე, შეიძინონ და მოიმარაგონ მათთვის სასურველი პროდუქცია: ხილბოსტნეული, ხორცი, რძის პროდუქტები, ჰიგიენური თუ სახლის მოვლის საშუალებები და სხვა.
ონლაინ ჰიპერმარკეტის ასორტიმენტი დაახლოებით 1500 დასახელების პროდუქტს მოიცავს, სადაც ქართული ფერმერული ნაწარმის საკმაოდ ფართო არჩევანია, რაც, თავის მხრივ, ადგილობრივ ფერმერებს საშუალებას აძლევს, პროდუქციის რეალიზაცია ონლაინ ჰიპერმარკეტის საშუალებით მოახდინონ. ჩვენთვის ხარისხის შენარჩუნება ერთ-ერთი უმნიშვნელოვანესი ფაქტორია, ამიტომ ყოველდღიურად ახალი და მხოლოდ უმაღლესი ხარისხის აგრო მიმართულების პროდუქციით ვავსებთ ვილის დახლებს.
თბილისის მასშტაბით, ყველა შენაძენი ნებისმიერ მისამართზე მიგვაქვს შეუზღუდავი რაოდენობით და რაც ყველაზე მთავარია, მიწოდების სერვისი ჩვენთან უფასოა, ანუ მომხმარებელი მხოლოდ პროდუქციის საფასურს იხდის.
ამასთან, ვილის ონლაინ ჰიპერმარკეტში მომხმარებელს შეუძლია, შეკვეთა წინასწარ, რამდენიმე საათით თუ დღით ადრე დაგეგმოს, რაც მას დროის უფრო ეფექტურად გამოყენების საშუალებასაც აძლევს.
დამფუძნებლები
ვილის დამფუძნებლები არიან ტექნოლოგიებისა და ბიზნესის სხვა სფეროში უკვე გამოცდილი ადამიანები. ეს სფეროებია Internet Technologies, Development, საგანმანათლებლო სფერო (logicmeter), საერთაშორისო გადაზიდვები. ყველა ამ მიმართულებაში მაქსიმალურად ვიხმართ თანამედროვე ტექნოლოგიებს.
VILI-ს პირველი ნაბიჯები
პირველ ეტაპზე ტექნოლოგიაზე მუშაობა და კომერციული მიმართულებით ძლიერი პარტნიორების მოძებნა დავიწყეთ. დიდი დრო წაიღო ინფრასტრუქტურის, შიდა პროცესინგის მოწესრიგებამ. გაშვების შემდგომაც არ იყო მარტივი ამ სპეციფიკურ ბიზნესში საოპერაციო მიმართულების ოპტიმალურად გამართვა. როგორც ყველა დამწყებმა ბიზნესმა, რა თქმა უნდა, ჩვენც დავუშვით შეცდომები, თუმცა, ძალიან მალევე გამოვასწორეთ და დღეს ოპერირების კუთხით საკმაოდ დახვეწილ სერვისს ვთავაზობთ მომხმარებელს.
გამოწვევები
ყველაზე რთული გამოწვევა ვილისთვის ალბათ მომხმარებლების ნდობის მოპოვება იყო. მოგეხსენებათ, მომხმარებლისათვის რთულია, განსაზღვროს აგრო პროდუქციის ხარისხი, როცა მას თავად არ არჩევს, არ ეხება, არ აგემოვნებს, თუმცა, ვინც ერთხელ მაინც ისარგებლა ვილის მომსახურებით, დარწმუნდა, რომ კომპანია ხარისხზეა ორიენტირებული და მომხმარებელს ვუქმნით კომფორტს, მიიღოს უმაღლესი ხარისხის პროდუქტები სახლიდან გაუსვლელად.
Shark Tank
განვითარების ერთ-ერთ ეტაპზე დავიწყეთ ინვესტორების მოძიება, რაც საშუალებას მოგვცემდა, კიდევ უფრო სწრაფად გაზრდილიყო VILI. აღნიშნული პროექტის შესახებ ვიცოდით და დავიწყეთ მომზადება პროექტში მონაწილეობის მისაღებად.
გავაანალიზეთ და ჩამოვაყალიბეთ ის საკითხები, რომელთა მოგვარებაშიც პროექტში მონაწილეობა და, მით უფრო, გამარჯვება დაგვეხმარებოდა.
ვფიქრობდით, რომ რომელიმე შარქს დავაინტერესებდით ჩვენი პროექტით და აუცილებლად მოვიპოვებდით ჩვენთვის სასურველი მოცულობის ინვესტიციას.
იმაშიც დარწმუნებული ვიყავით, რომ საინტერესო პროექტი გვქონდა და ვფიქრობ, საკმაოდ კარგად ვიყავით მომზადებული, რაც საბოლოო შედეგზე დადებითად აისახა.
მოპოვებული ინვესტიცია კი კომპანიის მარკეტინგის განვითარებასა და სატრანსპორტო საშუალებების რაოდენობის გაზრდას მოხმარდება, რაც საშუალებას მოგვცემს, ჩვენს მომხმარებლებს კიდევ უფრო სწრაფად და ორგანიზებულად მივაწოდოთ მათთვის სასურველი პროდუქცია.
სამომავლო გეგმები
როგორც მოგახსენეთ, ამ ეტაპზე პროდუქციის მიწოდებას მხოლოდ თბილისის მასშტაბით უზრუნველვყოფთ, ამიტომ ზაფხულის დადგომასთან ერთად, გვინდა, ჩვენი დაფარვის არეალი გავზარდოთ და თბილისის მიმდებარედ არსებულ სააგარაკე ზონებსაც მოვემსახუროთ. ამასთან ერთად, თბილისში დამატებითი ფილიალების გახსნას ვგეგმავთ, შემდგომ ეტაპზე კი ქვეყნის მასშტაბით ყველა დიდ ქალაქში გასვლასა და ოპერირებას.
შეგახსენებთ, საქართველოს პირველ არხზე „შარქ თენქ საქართველოს“ გენერალური პარტნიორი საქართველოს ბანკია. SONY Pictures-ის რეალითი შოუ – Shark Tank ერთ-ერთი ყველაზე პოპულარული შოუა, რომელმაც 5 კონტინენტი მოიცვა. ის უკვე 13 სეზონია მაყურებლების ერთ-ერთ ფავორიტ გადაცემად რჩება.
