საქართველოს ეკონომიკის 13.8% ვაჭრობაზე მოდის, რაც ამ სექტორის განსაკუთრებულ როლზე მიუთითებს. ვაჭრობის მნიშვნელოვანი კომპონენტი სასურსათო საქონელია, რომლის გაცვლის ადგილი უფრო და უფრო მეტად სუპერმარკეტებია.
ამ რეიტინგში წარმოდგენილია ქართულ ბაზარზე არსებული ათი უმსხვილესი სუპერმარკეტი და მათი ფინანსური მაჩვენებელები. სუპერმარკეტების რეიტინგი მომზადებულია 2023 წლის მოგების მარჟის (დაბეგვრამდე მოგების ფარდობა შემოსავლებთან) მიხედვით.
კომპანია ბაზარზე ოპერირებს 2016 წლიდან. ამჟამად გახსნილი აქვს ხუთი ფილიალი თბილისის მასშტაბით, ერთი კი – ბათუმში. შპს აგროჰაბის 100%-იან წილს აკაკი ახვლედიანი ფლობს, ხოლო კომპანიის დირექტორი გიორგი ჯაშიაშვილია.
ფრესკო თბილისის მასშტაბით არსებულ 9 სუპერმარკეტს აერთიანებს და 500-ზე მეტ ადამიანს ასაქმებს. კომპანია 2013 წელს დაფუძნდა, რომელსაც ფლობს ოფშორში რეგისტრირებული V.P.S. GROUP LIMITED. კომპანიის საბოლოო მესაკუთრეებს წარმოადგენენ ვასილ სოფრომაძე და მადონა კიკორია.
უნივერსამი 2017 წლიდან ოპერირებს. ამ პერიოდს უკავშირდება მეტრო ახმეტელის სავაჭრო ობიექტი, ხოლო 2018 წელს მეტრო ვარკეთილის ობიექტი. უნივერსამს 2021 წლიდან აქვს ერთი მაღაზია რუსთავში. შპს უნივერსამის 75%-ს იოსებ ღუდუშაური ფლობს, ხოლო დანარჩენ 25%-ს – თამთა დვალიშვილი.
ორი ნაბიჯი ფართო ქსელის მქონე კომპანიაა, რომელიც აერთიანებს დაახლოებით 470 საცალო მაღაზიას და ასაქმებს 4.3 ათასამდე ადამიანს. შპს ორი ნაბიჯი 2009 წელს დაარსდა, რომლის 33.34%-ს ფლობს გოჩა ცქიტიშვილი, ხოლო 33.33%-33.33%-ებს გიორგი ჩხეიძე და კახა ბექაური.
ნიკორა ქვეყნის მასშტაბით მაღაზიების ქსელს აერთიანებს, რომლის რაოდენობა 2023 წლის ბოლოს 579 ერთეული იყო, სადაც 8 ათასამდე ადამიანი მუშაობდა. ნიკორა ბაზარზე 2000 წელს გამოჩნდა, რომელმაც მოგვიანებით შეიძინა სანდეის, ველესის, ლიბრეს და ნუგეშის ქსელები. სს ნიკორა ტრეიდის მფლობელი თემურ ალექსანდრიაა.
ნაზილბე 2019 წელს ბათუმში დაფუძნებული მაღაზიების ქსელია, რომელიც 25 მაღაზიას აერთიანებს (მათ შორის, 20 მაღაზია ქალაქ ბათუმში მდებარეობს), სადაც 700-მდე ადამიანი დასაქმებული. კომპანიის 100% ფლობს და მას ერთპიროვნულად მართავს კახა ბერიძე.
შპს ს მარკეტსი ვეი მარტის ბრენდის ქვეშ ოპერირებს სოკარის გასამართ სადგურებზე. კომპანიას სრულად შპს სოკარ ჯორჯია პეტროლეუმი ფლობს, ხოლო ხელმძღვანელობს ნოდარ ყანჩაველი.
ფუდმარტი საკუთარ და ფრენჩაიზული მაღაზიების ქსელს აერთიანებს, რომლის რაოდენობა 570 ერთეულია. კომპანია ფლობს სპარის, იოლის და კალათას ბრენდებს, სადაც დასაქმებულია 3 ათასზე მეტი ადამიანი. კომპანიას შპს დეილის საშუალებით რამდენიმე ფიზიკური და იურიდიული პირი ფლობს. ყველაზე მსხვილ წილს, შპს ჰოდლინგ.ჯი-ის საშუალებით არჩილ გეგენავა ფლობს.
შპს მაჯიდ ალ ფუტაიმ ჰიპერმარკეტს ჯორჯია საქართველოში კარფურის ბრენდის ქვეშ 2012 წლის სექტემბრიდან ოპერირებს. 2023 წლის მდგომარეობით კომპანია 6 ჰიპერმარკეტს, 18 სუპერმარკეტს და 71 მაღაზიას აერთიანებდა, სადაც თითქმის 3 ათასი ადამიანი მუშაობდა. ქსელს არაბთა გაერთიანებულ საამიროებში რეგისტირებული კომპანია ფლობს.
შპს რითეილ ჯგუფი სუპერმარკეტების ქსელ მაგნიტს აერთიანებს, რომელიც 2023 წლისთვის 349 მაღაზიას მოიცავდა. რითეილ ჯგუფი 2017 წელს დაფუძნებული კომპანიაა, რომლის დირექტორი შალვა ჩოჩელია და რომელსაც სრულად ფლობს შპს დეილი.
მეთოდოლოგია
სუპერმარკეტების რეიტინგისთვის გამოყენებულია 2023 წლის ფინანსური მაჩვენებლები, რომელთა წყარო ბუღალტრული აღრიცხვის, ანგარიშგებისა და აუდიტის ზედამხედველობის სამსახურის ანგარიშების პორტალში წარმოდგენილი ფინანსური და მმართველობითი ანგარიშგებებია. მოგება წარმოდგენილია გადასახადებამდე. კომპანიის რეგისტრაციისა და მესაკუთრის შესახებ ინფორმაცია მოპოვებულია საჯარო რეესტრიდან (21.01.2025 მდგომარეობით ხელმისაწვდომი).
